ШИМОЛИЙ-ҒАРБИЙ УСТРУШОНАНИНГ ИЛК ЎРТА АСР ҚИШЛОҚ МАКОНЛАРИ ТУРЛАРИ ВА УЛАРНИНГ ФУНКЦИОНАЛ ХУСУСИЯТЛАРИ

Аннотация

Ўрта Осиё ҳудудининг жанубидан Ҳиндистонга қадар юртларни ўз тасарруфига киритган, ўз даврининг марказлашган, бой ва қудратли давлатларидан бири Кушонлар салтанати, минтақанинг марказий, шимолий, шимолий – ғарбий ўлкаларида ўз ҳукмдорлигини ўрнатган Қанғ конфедератив давлати даврида бошланган юксалиш мамлакат аҳолисининг ижтимоий, иқтисодий, маданий ва сиёсий ҳаётида муҳим ўзгаришларга сабаб бўлди. Кушон подшоҳлиги, айниқса шоҳ Канишка давридан тараққиётга юз тутиб, ижтимоий, иқтисодий, сиёсий ҳаётнинг барча йўналишларида ўз мавқейи ва таъсирини қўшни халқларга ўтказиб келган. Қанғ давлати тасарруфидаги ҳудудлар аҳолисининг турмуши ўтроқ, ярим ўтроқ, чорвадор кўчманчилик тарзида бўлган.